Gure hiria, Gasteiz, Jamaikara pixka bat hurbiltzearren, izen honen atzean hainbat ekintza egiteko proiektua martxan jarri genuen 2018an. Modu natural batean, eta daramagun denbora gutxian balantze positiboa eginez, kolektibo bezala funtzionatzea erabaki dugu. Helburu nagusiak berdina izaten jarraituko du, gure lurraldean kultura eta musika jamaikarra sustatzea, alegia.

Gasteiz Euskal Herriko musika jamaikarraren historiaren sehaska edo sorterria dela esan dezakegu. Izan ere, Hertzainak taldearen eskutik lehenengo ska doinuak iritsi ziren, punkarekin nahasirik, eta apur bat ondoren, Potato taldeak reggaearen sustraiak gogor errotu zituen. Hala ere, azken urteotan gure hiriko eszena era isolatuan funtzionatu duela uste dugu, eta ez dela eszenaren inguruan sare bat egon; eta hori da ere Zuretzako Mezuaren helburuetako bat.

Azken aldian Euskal Herriko eszena jamaikarrak kriston loraldia izan du, kolektibo, sound system, selektah, DJ, talde eta honen inguruan lanean dauden pertsonei esker. Eredu asko hartu ditugu, eta argi daukagu hau soilik hasi egin dela.
WAKE GASTEIZ AND TELL THE PEOPLE!